Vorherige Geschichte
hier
sind, aus meiner Erinnerung (von Sepp Lang), zwei Schmunzelgeschichten von
Lazarfeld und von Klek, nacherzählt.
Damit sie authentisch klingen, hat sie der Fochler Peter in´s "Lazarfelder-Schwowisch"
übertragen.
Gruß vom Lang Sepp.
"Wie die Lazarfelder ihren Herrgott vrkaaft han"
Wann mr vun Lazarfeld uf Betschkerek-Klek, Sigmanfall, Sartschi-Ernsthas gfahr is, sin außerhalb vum Dorf am Wechrand so 3m hochi Holzkreiz gstann, wu aus Blech a zugschnittene un angemolter gekreizichter Herrgott gstann is. Beim Vorbeifahre oder gehn, han sich die Leit gewohnheitsmäßich bekreizicht. Johr-in un Johr-aus is tes Kreiz dort dem Wetter ausgsezt gewenn un die Farb is abgeplättert, des Blech geroscht un for a Renovierung war des Geld net leicht ufzutreiwe.
So is noo der Herrgott mol runnergfall.- Zufällich is de Eisejud mit seiner Fuhr dort vorbei kum un hat des Blech dort leie gsien. Hebt des roschtichi Blech uf un fahrt zum Bürgermeister un froht, ob er des roschtichi Zeich des er gfunn hat net um etwas Geld kaafe kennt. Sie sin sich gschwind mit a phaar Dinar einich kinn un d Eisejud fahrt rufend "Altes Eisen ,aldi Fetze " weider durch die Gasse. Die Gschicht hat sich in die Nochber-Gemeinde gschwind rumgsproch un es hat gheest, die Lazarfelder han ihre Herrrgott em Eisejud verkaaft.---(Der Eisejud hat in wirklichkeit geruft, aldes Eise, aldi Fetze, aldi Weiwer. Des terf mr awer net schreiwe, weil jetz alli alt sin).
Awer ach die Kleker han so a Spotgschicht khatt.
No der Kerch - Renovierung äüßerlich in Klek, han die Leit bemerkt, dass an phaar Stelle am Dach, des Graß gewachst is. Niemand hat sich getraut nufzusteie un des Gras abmähe oder vernichte. Do is eener uf die Idee kum, demVetter Matz sei Schimmel, der immer so vrhungert ausgschaut hat, nufzuzije. Der werd des Gras no schun abweede.- Gsaat un gemacht, han se den Schimmel mitm lange Strick umschnürt un vun der hechscht Stell angfang nufzuzieje. Als er schun fascht owe war, hat er die Zung rausgstreckt un die Leit han gement, er hats Gras schun ksien un mecht weede. Awer als die Helfer no vun der Turmlucke gschaut han, han se zu ihrem Entsetze feschtstelle misse, dass de Schimmel stranguliert war un desweje die Zung rausgstreckt hat.-
Durch die Gschicht, han die anri Ortschafte die Kleker aach vrspotte kenne !